عن أتحـــــــاد الكوسة أحدثكم!!ا

كتر الكلام اليومين دول عن ما يسمى جدلا و مجازا باتحاد الكورة المصرى،
يعنى مسميات كتير اطلقت عليه...زى اتحاد البيزنس و الاتحاد الأحمر وانا اهو سميته اتحاد الكوسة.
يعنى من الاخر مفيش حد فى البلد دى عجبه الاتحاد
بصرف النظر عن انتمائتنا الكروية
اهلاوى زمالكاوى اسمعلاوى اى حد
اى محلل بيجى فى التليفزيون و يتسأل على مستقبل الكورة فى مصر يا اما يبستم ابتسامة دبلوماسية و يحاول يحور فى الاجابة اكيد عشان مايزعلش صحابه اللى فى الاتحاد
يا اما ينزل تخبيط فيه و يحسسك انها بايظة بايظة و هى فعلا كده

طب لو نيجى نشوف انجازت الاتحاد ده
هنلاقيها صفر كبييييييير حاجة كده تشبه صفر المونديال

يعنى اعتقد ان مصر أم الدنيا بتنفرد بظاهرة انها مالهاش موسم كروىمحدد..ماشيين كده بالبركة ..وماتبصليش بعين راضية بص للى اندفع فيا

مانساش كلمة قالها الكابتن المهذب/محمود الخطيب وهو فى لقاء تليفزيونى وكان بيتكلم على الموضوع ده وبيقول ان لما كان الاهلى بيتصل باندية اوربية عشان يتفق معاهم على لعب ماتشات ودية
يلاقوا الناس بتقولهم معلش احنا ماعندناش اوقات فاضية ممكن نلعب فيها ماتشات ودية لحد سنة 2009 !!ا
يا نهار ازرق
واحنا الاتحاد بتاعنا عاجز انه يخطط لموسم كروى واحد!!ا
وطبعا الاجابة اللزجة اللى بيرد بيها الاتحاد

يقولك واحنا نعمل ايه ..جدول الدورى ده محتاج لساحر عشان يحطوا عشان يقدر يعمل توازن بين مواعيد الدورى و بين مواعيد البطولات التانية اللى بتدخلها الفرق...

وكأننا بسم الله ماشاء الله فى مصر هنا أنديتنا هى بس اللى بتدخل بطولات و هما بره فى اوربا وحشين و فاشلة و مش بيلعبوا بطولات تانية
وطبعا ده رد اقل ما يقال يقال عليه انه لزج

لان المعروف ان فى اصول للحاجات دى ..زى ما الدكتور علاء صادق قال -وهو فى وجهة نظرى المتواضعة-أفضل محلل فى مصر كلها..

قال
ان الموضوع بسيط جدا و ان الفرقة نسبلها 4 ايام قبل الماتش اللى هى مرتبطة بيه فى البطولة اللى هى داخلاها فى حالة اللعب فى مصر ..اما لو كان بره يبقى 5 ايام
ده الكلام الصح

والكلام ده يطبق على الكل..سواء اهلى او غيره ..عشان بقى الكلام الحمضان بتاع ان ده الاتحاد اهلاوى وبتاع..انا اهوه بقول يطبق على الكل
لكن نيجى بقى للى احنا عايشين فيه ده ..نلاقى دورى لسه ماخلصش وبطولة الكاس تبدأ وبعدين الكاس يخلص نلاقى اوبا الكاس السوبر ..وبعدين كل سنة وانت طيب الدورى بدأ

الايام جريت والله

مانساش كلمة قالها جوزيه ..قال الدنيا كلها السنة فيها 12 شهر الا هنا السنة 13 شهر...ومش مشكلة بقى لاعبية الاهلى وراحتهم، مهما اصلهم مكن شغال طول السنة مش بيعطل ومش مشكلة بردو أهاليهم وبيوتهم ..النتيجة طبعا بنلاقى لاعيبة الاهلى اللى هما العمود الفقرى للمنتخب بشهادة الجميع بيقعوا زى الدبان فى نص الموسم..

نيجى بقى لموضوع المواقف اللى بياخدها الاتحاد

مثلا لمشكلة زى مشكلة عبد ربه
بصرف النظر ان اللاعب ده محل نزاع

(ولو انه من حق الاهلى قانونا ) ..نيجى نشوف مهازل حصلت و الاتحاد لم يحرك ساكنا
يعنى الجماهير تغضب و تهديدات للاعب و نعش وافلام هندى ..المفروض ان اى اتحاد بيحترم نفسه يصدر قرار بوقف اللاعب من اللعب للاسماعيلى لمدة سنة..ويكون ده رادع قوى لاى جمهور خايف على فرقته انه يكبح جماح غضبه ...لكن احنا شايفين اننا عايشين فى غابة،
يعنى بالجهود الذاتية كده..اللاعب بعد ما وقع يقوم يقول انا خلاص انا رغبتى انى العب للاسماعيلى ..ما هو الراجل بردو خايف على نفسه وكأننا قاعدين فى مكتب تنسيق

نيجى للفضيحة بقى اللى هى بجلاجل ..وفشل المنتخب الاوليمبى

وخروجه المخزى من البطولة ..طبعا معنى فشل منتخب اولييمى يبقى مصر تفقد الامل فى منتخبها لمدة 5-10سنين قدام على ما يطلع جيل تانى

ضيف بقى على كده العقوبة الكوميدية بتاعة شيكابالا اللى فعلا تحسسك بعشوائية القرارات اللى بتطلع
يعنى اولا انا شايفة ان شيكابالا مش لوحده المسئول ..واذا كان الاتحاد جامد اوى كده و بيعاقب شيكابالا على سلوكه وبينتصر للمبادىء طب بالذمة كده
ايه اللى هيوجع شيكابالا اكتر ..انه يتوقف عن اللعب للمنتخب ولا النادى بتاعه ..مين اللى هينضر بالعقوبة دى ..المنتخب اللى هيخسر جهود لاعب ولا شيكابالا
يعنى اكيد اى مدرب لما يصدق ان لاعب من عنده مش هيروح المنتخب عشان مايتصبش ولا ييجراله حاجة
حكم احنا عندنا هنا فى مصر المدربين بيتعاملوا مع الدورى ..كانه دورى أبطال اوربا وبيحطوه فوق مصلحة المنتخب المصرى
طبعا

يعنى بالذمة كده هيجى ايه المنتخب جنب دورى بينافس فيه الاسماعيلى والزمالك على المركز التانى..والجيش وانبى وحرس الحدود على المركز الرابع
وبقية الفرق بتنافس على عدم الهبوط !!! مع احترامى الشديد لكل الفرق دى

نيجى بقى للنكتة اللى بجد
اللى هى السبوبة ...قصدى كاس السوبر
يعنى نادى واخد البطولتين الدورى والكاس ..المفروض هيلاعب مين؟؟ ...يجى الزمالك اللى هو المركز التانى يعتذر عن البطولة و بعدين التالت يسكت على اعتبار اننا المفروض نستنتج ان السكوت علامة الرضا و بعدين يتعرض على الرابع فيفكر شوية و بعدين يعتذر وبعدين اخيرا الاسماعيلى أعلن أنه وافق
مش فاهمة ايه التهريج ده
بردو مصممين يعملوها ..وقال يقولك انهم خلاص ارتبطوا باعلانات مع الشركات و كده ..وفى داهية بقى راحة لاعيبن الاهلى اللى مفحوتين طول السنة ..اهم حاجة الاعلانات و البيزنس


الواحد هيقول ايه بس
لو قعدنا نتكلم عن اتحاد الكورة ده الواحد عايز بوستات

لكى الله يا مصررررررررر