ولا يهمك يا أهلى

قدر الترجى النهاردة مع كل اسف فى تحقيق

اول هزيمة لبطل افريقيا

وتعطيل المسيرة الاهلوية نحو الدور قبل النهائى

فريق كان كله أمله الاداء المشرف والتعادل مع الاهلى ليرضى جماهيره

فاذا به يفوز على الاهلى

بس عموما كل اللاعيبة ماكانوش فى حالتهم

حالة من الشرود وعدم التركيز كانت ماسكة الفريق

خط الوسط كان فى حالة ترهل و توهان وانعكس ده على خط الدفاع و الهجوم

مانقدرش نقول على لاعيب بعينه كان وحش لان كل اللاعبية كانوا مش مركزين

بالاضافة الى سوء حظ -بالبلدى كده ماكنش يوم الاهلى النهاردة-وكمان

الحكم المتعشى اللى كان شوية شوية هيقول للاهلى كلكو بره

انذارات زى المطر ايده ما سبتش الكارت الاصفر..وخلى كتير من اللاعيبة تفقد اعصابها

ولعل ابرز تأليفة من الحكم كانت الانذار اللى اداه لفلافيو مع ان فى الاعادة لاقينا فلافيو ماجاش جنب اللاعب بس نقول ايه

وطبعا الافلام التركى الهابطة اللى بيعملها لاعيبة تونس فى التمثيل و الحركات البلدى اللى بتتعمل دى لما يحبوا يضيعوا الوقت

وكمان تأثر الاهلى بغياب عماد متعب واسلام الشاطر

كله ده اكد على فوز الترجى النهاردة وماداش الاهلى اى فرصة

بس مهما كان ارجع واقول النهاردة الاهلى ماكنش فى حالته

و اعتقد ان الهزيمة دى مفيدة جدا بالنسبة للاعبى الاهلى

عشان يفوقهم و و يفكرهم بدرس عدم الاستهانة بالخصم مهما كان،

المعروف ان الاهلى لما بيتحط تحت ضغط بيدى كل ما عنده ودى فرصة كويسة للاعيبة عشان تفوق و تركز وتفتكر طعم الهزيمة مر ازاى

مش مشكلة هزيمة النهاردة

مهما كان مفيش فريق بيكسب على طول

وان شاء الله نركز فى اللى جاى

تحديث من مهند

التمثيل وتضييع الوقت من تونس كلها مش الفريق ده بس

والكل فاكر ماتش الصفاقصي واللي عملوه

لكن قمة حرق الدم فعلا منت العيال اللي بتلم كور ورا الشبكة

العيال بمنتهي البرود أمير بيقولهم هاتوا الكوره ودول واقفين متسمرين وفي الاخر واحد منهم رضي عنه ومد ايده وقاله خد وكمان عايزه يجي ياخد الكوره منه مش هو اللي يوديها لامير

عنده حق يا اخي هو شغال عند اهلنا

لا حول ولا قوة الا بالله

بلد مستفزه فعلا

بالنسبة للحكم

ارجو من الاتحاد الافريقي يجعله حكم كل مباريات الاهلي والزمالك

علشان الزمالكاويه تفرح علي ايده

اصله بيخاف قوي

ومبيشوفش اصلا

والله العظيم جنب الكوره ويرفع ايده الناحية التانيه

تقريبا كانت وجعاه

معلش يا جماعه اصلي اتشليت من الماتش

تحياتي